Миңнеханов һәм «Ромекс» башлыгы Татарстанда күпләп сату үзәге төзү турында сөйләште

<p>Татарстан Рәисе <strong>Рөстәм Миңнеханов</strong> Петербург халыкара икътисади форумы кысаларында «Ромекс» компанияләр төркеме президенты <strong>Сергей Прокопенко</strong> белән очрашты. Оешма күпләп сату-бүлү үзәкләре төзү буенча зур тәҗрибәгә ия. Республикада компаниянең гомуми суммасы 9 миллиард сумнан артык булган 4 инвестиция проекты гамәлгә ашырылган, тагын ике проект гамәлгә кую процессында.

Бу хакта ТР Рәисенең матбугат хезмәте җитәкчесе <strong>Лилия Галимова</strong> сөйләде.</p> <p>«Тагын бер бүлү үзәген ачу безнең предприятиеләр һәм тәэмин итүчеләр өчен Россия төбәкләренә һәм аннан читтә продукция китерү мөмкинлекләрен киңәйтә, эшмәкәрләрнең транспорт-логистик чыгымнарын киметә. Шул рәвешле Татарстан мөһим логистик хаб һәм интернет-сәүдә үзәгенә әверелә», – дип билгеләп үтте республика җитәкчесе.</p> <p>Яклар «Тура 2.0» сәнәгать паркында «Яшел үзән 4» күпләп сату-бүлү үзәген төзү буенча инвестицион проектны гамәлгә ашыру турында фикер алышты.</p>