24-29 март көннәрендә Татарстан башкаласында Роберт Миңнуллин исемендәге Республика балалар китапханәсендә Бөтенроссия балалар китабы атналыгы узачак. Бу хакта Татарстан Мәдәният министрлыгы матбугат хезмәте хәбәр итә.
Бу юлы «Дәвамлы тарих» дип аталган балалар китабы атналыгы Бөек Ватан сугышында Җиңүнең 80 еллыгына һәм Россиядә игълан ителгән Ватанны саклаучылар елына багышлана.
Балалар китабы атналыгы кысаларында Республика балалар китапханәсе тарафыннан мәшһүр балалар язучылары һәм шагыйрьләре белән иҗади очрашулар, яшь укучылар өчен мастер-класслар һәм танып белү диалоглары, викториналар һәм фильмнар күрсәтүдән торган киң күләмле мәдәни программа әзерләнгән.
Балаларның үзләре өчен билгеләнгән әсәрләр авторлары белән очрашуларына аерым игътибар бирү планлаштырыла. Язучылар әдәби текстлар язу серләре белән уртаклашырга, иҗади укулар үткәрергә һәм яшь укучыларның сорауларына җавап бирергә җыена.
Мондый вакыйгаларны оештыру «Гаилә» илкүләм проектының «Гаилә кыйммәтләре һәм мәдәният инфраструктурасы» федераль проектының максатларына һәм бурычларына туры килә.
Бөтенроссия балалар китабы атналыгы - балалар китабын тәкъдим итү буенча иң зур чара һәм илебезнең иң борынгы мәгърифәтчелек акциясе. Татарстан өчен ул аерым әһәмияткә ия, чөнки Республика балалар китапханәсе бу чараны 1946 елның 26 мартында кабул иткән инде. Балалар китабы атналыгы хәзерге формада 1943 елдан бирле үткәрелә (бер тапкыр гына акция 1929 елда уздырылган, ә идея үзе беренче тапкыр Кушма Штатларда 1919 елда тормышка ашырылган).
Свежие комментарии