Татарстан Россиянең энергетика иминлеген тәэмин итүгә зур өлеш кертә. Бу хакта Татарстан Республикасы Рәисе Рөстәм Миңнеханов Бәйсез Дәүләтләр Берлеге Электр энергетикасы советының «Казан Экспо» күргәзмә үзәгендә «Энергопром» Татарстан энергетика форумы кысаларында узган 66нчы утырышында белдерде.
Рөстәм Миңнеханов билгеләп үткәнчә, Казан икенче ел рәттән тармакның әйдәп баручы белгечләрен кабул итә.
«Электр энергетикасының актуаль мәсьәләләре турында фикер алышулар алып барыла торган шундый зур чара уздыру безнең өчен зур дәрәҗә», – дип ассызыклады ул.Татарстан Рәисе төбәкнең лидерлык позициясен раслаучы төп мәгълүматларны китерде:
- 2024 елда республиканың тулай төбәк продукты 5,2 триллион сумнан артып китте;
- электр энергиясен куллану 5,1 процентка артты һәм 35 миллиард киловатт-сәгатькә җитте;
- Татарстан энергетикасына соңгы биш елда якынча 170 миллиард сум инвестицияләнгән.
«Без инфраструктураны актив рәвештә модернизациялибез һәм инновацияләр кертәбез. Санкцияләр, чакыруларга карамастан, илебез технологияләре үсешенә этәргеч бирде», - дип белдерде Татарстан Рәисе.
Россия энергетика министры Сергей Цивилев, үз чиратында, Татарстан җитәкчелегенә форумны оештырган өчен рәхмәт белдерде һәм KazanEnergyExpo күргәзмәсен югары бәяләде. Ул энергетикларның җиңүгә һәм Бөек Ватан сугышыннан соң тармакны торгызуга керткән өлешенә багышланган «Икеләтә җиңүчеләр» экспозициясенә аерым игътибар бирде.
«Безнең уртак эшебез Бәйсез Дәүләтләр Берлеге илләре арасындагы дустанә элемтәләрне ныгытачак, дип ышанам», - дип йомгаклады Цивилев, утырышта катнашучыларга мөрәҗәгать итеп.
Свежие комментарии