«Татарстан – Яңа гасыр» телерадиокомпаниясенең «Болгар» радиосы талантлы яшьләр өчен «Элемтә» дигән тапшыру башлап җибәргән. Сценарий авторы, редактор, ТР Журналистлар берлеге әгъзасы Гөлназ Рәшитова әлеге тапшыруның яшьләр өчен мөһимлеген ассызыклады.
«Татар яшьләре - креатив, зәвыклы, фикерле, талантлы!
Татарстаныбызда андыйлар шактый, аларны күрергә һәм мөмкинлек кенә бирергә кирәк. Башта «ЯшьЛайн» проекты булса, хәзер шуңа охшаш проектны радиода да башлап җибәрдек. Өр-яңа «Элемтә» тапшыруы. Яшьләр турында яшьләрчә! «ТНВ», «Болгар» радиосы җитәкчелегенә, ТР Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе, ТР Дәүләт Советы рәисе урынбасары Марат Готыф улы Әхмәтовка рөхсәт, мөмкинлек һәм ышаныч өчен рәхмәт», – дип сөйләде «Татар-информ»га ул.Шулай ук Гөлназ Рәшитова тапшыруның форматы һәм кемнәр аның геройлары булуын да әйтте.
«Тапшыруга яшь, талантлы җырчылар, музыкантлар, биючеләр, язучылар килә. Тапшыруның форматы да кызыклы – бу радиоспектакль. Австралиядә яшәүче татар егете Илхан социаль челтәрләр аша Казанда яшәүче татар кызы Рәйхан белән таныша. Илханны татар мәдәнияты бик нык кызыксындыра, шуңа курә Рәйхан аны Татарстанда узучы кызыклы чаралар турында сөйли, талантлы дуслары белән таныштыра. Илхан ролендә Татарстанның атказанган артисты Артур Шәйдуллин, Рәйхан ролендә Галиәсгар Камал театры артисты Рәйхан Габдуллина булды. Күп яхшы фикерләр ишеттек. Тыңлаучылар җылы кабул итте. Киләчәктә дә шулай булыр дип өметләнәбез», – диде ул.
- Беренче тапшыру 29 март көнне радио дулкыннарында яңгыраган. Проект авторы – Резидә Нигъмәтуллина, сценарий авторы, редактор – Гөлназ Рәшитова. Тапшыруның тавыш режиссёры – Әлфинур Хисами.
Свежие комментарии