Татарстан студентлары Ставропольдә узган «Россия студентлар язы» җиңүчесе булды

<p>Татарстан Ставропольдә узган «Россия студентлар язы» III Бөтенроссия фестивалендә гомуми зачетта беренче һәм «Төбәк программасы» юнәлешендә өченче урынны яулады. Фестивальдә Россиянең 70 төбәгеннән ике мең студент катнашты, дип яза «Татар-информ».</p> <p>Татарстаннан 14 урта махсус белем бирү учреждениесенең 89 студенты чыгыш ясады.

Алар ун юнәлештә үзләрен күрсәтте: «Театр», «Вокал», «Инструменталь», «Арт», «Медиа», «Видео», «Төбәк программасы», «Оригиналь жанр», «Мода», «Бию».</p> <p>«Россия студентлар язы» фестивале студентларның иҗади үсешенә ярдәм итә, дип билгеләп үтте ТР Яшьләр эшләре министры <strong>Ринат Садыйков</strong>.</p> <p>«Татарстан урта махсус белем бирү учреждениеләрендә 90 меңнән артык студент белем ала. Республикабыз студентлары ел саен фестивальгә әзерләнә һәм яхшы нәтиҗәләр күрсәтә. Бу – студентлар, остазлар, уку йортларының уртак җиңүе», - дип ассызыклады министр.</p> <p>Республика Ставропольдә узган «Россия студентлар язы»нда 18 призлы урын яулады. «Безнең өчен бу яхшы нәтиҗәләр – 18 призер һәм номинацияләрдә җиңүләр, вокал юнәлешендә бер гран-при, гомумкоманда белән беренче урын һәм төбәк программасында өченче урын», – диде ТР Студентлар лигасы президенты <strong>Шамил Якупов</strong>.</p> <p>Конкурста җиңүчеләр турында мәгълүмат ТР Яшьләр министрлыгы сайтында чыккан.</p>